Niraradraraka ny fanendrena tompon’andraikitra ambony tamin’ny filankevitry ny minisitra ny alarobia 20 febroary teo. Anisan’izany ireo tompon’andraikitra ambony amina minisitera maromaro.
Mpitsara sady mpahay lalàna miisa 3 no notendrena amina toerana ambony, dia Atoa Ranesa Firiana, Sekretera jeneralin’ny minisiteran’ny paositra sy ny fifandraisan-davitra ary ny fampiroboroboana ny haitao ara-kajy mirindra; Fanahimanana Tiaray, Talen’ny seraseran’ny minisiteran’ny kolontsaina sy ny serasera; Imbiky Herilaza, Sekretera jeneralin’ny minisiteran’ny harena ankibon’ny tany. Mbola mpahay lalàna ihany koa Rtoa Sahondra Rabenarivo, izay voatendry ho Filohan’ny komity ho an’ny fiarovana ny fiandrianam-pirenena na ny CSI. Manana ny paikady sy heveriny fa fomba hahafahana mahazo fahombiazana ny mpitondra amin’ny fametrahana tompon’andraikitra ambony samihafa tahaka izao. Mahalasa saina kosa ny fisafidianana ireo olona, izay mpitsara sy mpahay lalàna napetraka amina toerana stratejika, ary fantatra fa na dia manana fahaizana amam-pahalalana hafa aza izy ireo dia ny maha mpitsara azy ireo aloha no re fa mason-tsivana voalohany nahatonga ny safidy nahazoana ilay toerana. Malalaka amin’izay tiany ny filoha sy ny ekipany, fa raha dinihina kosa io, dia toa mizotra amin’ny fakana ny fon’ny mpitsara. Eo ihany koa ny mety ho fiarovan-tena amin’ny filalaovana ny lalàna sy fanamafisana orina ny fanjakana mety mbola mahatsiaro marefo. Mety hidika ho fihenjanan’ny fanjakana amin’ny lafiny maro ihany koa anefa io, toy ny eo amin’ny tontolon’ny serasera hifehezana na hamelezana ireo haino aman-jery mety tsy dia levon’ny vavonin’ny mpitondra. Ny resaka lalàna no iankinan’ny ain’ny mpitondra satria io foana no niteraka adihevitra teto sy mety nanova zavatra na ny tantara mihitsy aza. Ny filalaovana lalàna na famoronana lalàna mihitsy aza no tsy nampiongana ny filoha tamin’ny fanonganan’ny depiote azy, ny resaka lalàm-pifidianana no niteraka fidinana an-dalambe tamin’ny aprily 2018.
