Voaresaka an-gazety sy tamin’ny haino aman-jery maro tato ho ato ny akon’ny fanadihadiana nataon’ny manam-pahefana ara-panjakana momba ny tohin’ilay raharaha « fanadinana fifaninanana nandraisana mpianatra ho mpitsara » ka nitrangan’ny fandoroana ireo taratasim-panadinana tamin’izany tao amin’ny efitrano iray efa nanagiazana azy ireo tao amin’ny Sekoly ambony Fanofanana ho mpitsara sy ho mpiraki-draharaham-pitsarana.
Omaly ary, nandritra ny fotoam-pitsarana manetriketrika ho fametrahana amin’ny toerany ireo lehiben’ny fampanoavana ao amin’ny Fitsarana Tampony izay sady lehiben’ny fampanoavana (Haute Cour de Justice) ihany koa dia naresaka teo anivon’ny mpitsara, teo amin’ny mpisolovava, teo amin’ny olo-manan-kaja sasany izay nasaina tamin’ity fotoam-pitsarana ity ny momba io raharaha teny amin’ny Sekoly Ambony Fanofanana ho Mpitsara sy ho mpiraki-draharaham-pitsarana io.
Raha ny vaovao nivoaka aloha dia toa efa nampanatsoina sy nohainoana teny amin’ny Bianco ny tompon’andraikitra sasany teo anivon’io sekoly io sy ny avy any amin’ny Ministeran’ny Fitsarana.
Ny ako naresaka omaly teny amin’ny Lapan’ny Fitsarana teny Anosy dia manipika tamin’ny ankapobeny hoe « maro ny olona nanaovan’i Voahangy Rajaonarimampianina fanelanelanana miendrika fanerena sy fandrahonana mihitsy fa tsy maintsy nohafahana tamin’iny fanadinana fifaninanana niteraka resa-be iny, ka rehefa nandray fepetra ny tompon’andraiki-panjakana, nangeja ny taratasim-panadinana, dia noteren’i Voahangy Rajaonarimampianina ny olona tao anivon’ny Sekoly Aambony handoro ny tao amin’ilay efitrano nangiazana an’ireo antotan-taratasy ». Ny antony dia ho takalon’ny tsy ho fanafahana an’ireo olona efa nakany vola fa tsy maintsy ho afaka tamin’io fanadinana fifaninanana io, ary mba hisakanana ihany koa an’izay tena mendrika mba samy tsy ho afaka.
Ny mahavariana ny mpanara-maso anefa dia hatramin’izao, tsy mba hoe voarohirohy na nampanatoina na efa andefasana taratasy fiantsoana i Voahangy Rajaonarimampianina.
Sa hoe « vadin’ny filohampirenena teo aloha ka tsy maty manota? » Sa tsy misy sahy manonona mivantana eo anoloan’ny manam-pahefana ny anarany?
Tsy tokony hadinoina koa aloha fa maroloha ny raharahan-keloka nahenoana ny anarany, nany fanondranana an-tsokosoko andramena na ny resaka fakana ankeriny na ny naferena olona ho tsy maintsy manome vola azy (amin’ny alalan’ny olona ihany) etsy sy eroa, na koa hatramin’ny fanelenelanana amin’ireto tontolon’ny fifanakalozana vola (transaction) any amin’ny rafi-panjakana ny Banky Foibe ka itakiany sanda aman’arivony tapitrisa, ny fanelanelanana ny baiko anerena ny tompon’andraikitra ho tsy maintsy manafaka ny olony amin’ny fifaninanana handraisana polisy na zandrary na fanadinam-panjakana amin’ny fadin-tseranana (ladoany momba ny hetra na ny fananan-tany, sy ny maro tsy voatanisa)
Manara-maso ny ho fananana tommpon’andraiki-panjakana sy manam-pahefana avy amin’ny fitsarana fahasahiana handray fepetra amin’i Voahangy Rajaonarimampianina ny maro, fa raha tsy mahavita an’izany dia hosokajiana ho mpiray tsikombakomba na mpiaro olona enjehina ny fitsarana, sy ny sisa.
