Isan’ny fifaninanana handraisana mpianatra ho pôlisy (Elève inspecteur de police, Elève commissaire de police…) niteraka resa-be teto amin’ny tany sy ny firenena ny fifaninanana natao ny taona 2017 teto. Naharitra herin-taona mantsy vao nivoaka ny vokatra ny fifaninanana ary nahitana tranga tena nibaribarian’ny kolikoly sy ny tsindry bokotra.
Raha 14 no voafaritra fa horaisina tamin’ireo nanao fifaninanana mivantana ho amin’ny mpianatra ho “kaomiseran’ny pôlisy” dia tafakatra 16 no nohafahana. Tamin’ireo tsy afaka dia nahagaga fa nisy no nahazo salan’isa ambony mihitsy. Dia zendana ny mpanara-maso satria nisy ny fitoriana ny hosoka mifototra tamin’ny kolikoly tamin’io fifaninanana io, ka niala andraikitra avokoa izay ambaratongam-pitantanana nandefasana ny raharaha. Hatramin’ny fitsarana no “nandraingiraingy” vokatry ny zavatra tsy mazava ka nanambara fa “tsy azo raisina ny fitoriana”.
Tamin’ny taon-dasa 2018 izany rehetra izany no nitranga.
Ny akon’ny vaovao re dia nisy tamin’ireo nohafahana no nihetsiketsika be, namory vola, raha nandre fa niakatra fitsarana ny raharaha. Nisy ny tsindry isan-tokony koa nahazo ireo tompon’andraikitra, ary voalaza hatramin’ny hoe “Ny vadin’ny filohampirenena dia Rtoa Rajaonarimampianina Voahangy mihitsy no nanome baiko fa ny olony tsy maintsy hafahana”. Dia nitadiavana antony mampihome ny nanitsanana an’ireo nahazo salan’isa ambony tsy nosokajiana ho isan’ny afaka. Tao ny hoe “tsy manan-kery ny mari-pahaizan’ny iray avy eny amin’ny oniversite, ary ny roa hafa nambara fa “njola maso” (???)
Ny nanaitra koa dia re fa tonga hatramin’ny hoe “éliminé-o physiquement any ireo” (ttf: vonoy ho faty any ireo) ny tenin’i Voahangy Rajaonarimampianina. Inona no dikan’izany ?
Ka amin’izao fotoana, efa tsy eo amin’ny fahefam-panjakana intsony ry Voahangy Rajaonarimampianina na ny vadiny izay nialokalofany, ka nahoana re raha iverenana jerena indray iny fifaninanana nandraisana mpianatra ho pôlisy tamin’ny 2017 iny dia ampanjakàna ny fahamarinana sy ny rariny fa tena loza ange ny nafitsoka ny fahefam-panjakana teo amin-dry Voahangy Rajaonarimampianina sy ny voka-dratsy nateraka ny fampiasam-bola tamin’ny sokajin’olona sasany tamin’izy iny e !
Iantsorohana andraikitra hijery ifotony an’ity raharaha ity ny minisitra ny Filaminana anatiny izay miahy ny pôlisim-pirenena, ny Bianco izay somary nalaina tamin’ny fandraisana fepetra, ny fitsarana tampony misahana ny ady ifanolanana amin’ny fanjakana na ilay antsoina hoe Filankevi-panjakana (Conseil d’Etat), ary nahoana moa raha miditra an-tsehatra hatramin’ny filohampirenena sy ny Praiminisitra raha izay no hahafahana mampanjaka sy miantoka ny marina sy ny rariny e ?
Ny fifaninanana nandraisana mpitsara ireny toa azo nandraisana fepetra rehefa hita fototra fa nanjakan’ny tsy fahamarinana sy ny kolikoly ka nahoana no hojerem-potsiny ny an’ny pôlisy ?
