Namaky am-batolampy ny fifandraisany tamin’ny mpandraharaha amin’ny andramena izay naiditra am-ponja eny Tsiafahy, herinandro maromaro lasa izay, ny jeneraly Ravalomanana Richard. Nanararaotra ny andro natokana ho an’ny zandarimaria tetsy Ampefiloha, omaly, ity manamboninahitra jeneraly Sekreteram-panjakana miadidy ny Zandarimaria (Seg) ity, ka niaiky ny fisian’ny fifaneraserany tamin’io mpandraharaha antsoina hoe Eddy Maminirina io. Nambarany fa tsy tamin’ny sehatry ny fandraharahana andramena velively no nifandraisany tamin’ity lehilahy voatazona vonjimaika any am-ponja ity.
Fantatra fa taorian’ny fifanolanana momba ny fiara iray teo amin’itsy farany sy ny manamboninahitra zandary iray, izay voalazany fa manana rohimpihavanana tamin’ny mpikamban’ny governemanta iray tamin’ny vanim-potoanan’ny tetezamita no nanombohan’ny fifankahalalan’izy ireo.
« Lehiben’ny fari-piadidian’ny Zandarimaria Antananarivo aho, tamin’ izany, ary tsy mbola nifankahalala taminy», hoy ny jeneraly Ravalomanana Richard teny amin’ny tranombokim-pirenena Ampefiloha, omaly. Efa saika niafara tamin’ny fanokafana fanadihadiana sy famotorana io raharaha fifanolanana tamina fiara io no teraka ihany ny fifandaminana teo amin’ilay mpandraharaha sy ilay manamboninahitra zandary, araka ny heno tamin’ny resaka nataon’ny Seg hatrany.
Fifanampiana marolafy
Navoakan’ny jeneraly Ravalomanana Richard, omaly, hatramin’ny fanampiana azony tamin’io mpandraha- raha io nandritra ny raharaha tao amin’ny fianakaviany. Nahazo hatramin’ny fianakaviamben’ny zandary satria nampahafantarin’ny Seg ankehitriny fa “ Nanampy ho an’ny sekoly tany Ambositra izy. Nisy koa ny fanampiana nataony tamin’ireo zandary rava trano tany Nosy-be”.
“ Tsy nisy vola noraisiko an-tanana kosa anefa ireo rehetra ireo fa ny lehiben’ ny sekoly sy ny sosialin’ ny vadin’ny zandary no nasaiko nifandray tamin’ io mpandraharaha io. Momba ny resaka andramena dia mbola kaomandin’ny Zandarimaria teto Antananarivo aho tamin’ izany, ka tsy misy andramena eto », araka ny fanazavana nataon’ity manamboninahitra ambony ity nanoloana an’ireo resabe avy amin’ ny fivoahan’ny vaovao momba ny fifandraisany tamin’i Eddy Maminirina.
Nohazavain’ny jeneraly Ravalomanana Richard hatramin’ny fananany, toy ireo tranony eny Ambohi- manga sy Ambatolampy mihitsy, ary ny fiara ampiasainy. « Fehiny, tsy misy fifandraisana hafa ankoatra ireo notanisaiko ireo teo amiko sy io mpandraharaha io ary azo porofoina avokoa izany », hoy ny Seg namarana ny fanazavany ny zava-nisy.
