Isan’ny nahasarika ny sain’ny maro mpanara-baovao ny lahatsoratra an-gazety nivoaka omaly teto an-toerana, ny amin’ny hoe “nisy iraka ny Bianco nalefa teny amin’ny trano fonenan’i Henry Rabary Njaka, tompon’andraikitra tao
anivon’ny fitondrana Rajaonarimampianina”. Teny Ambohimangakely no misy io trano fonenan’i Henry Rabary Njaka io.
Efa talen’ny kabinetran’ny filoha Rajaonarimampianina izy tamin’ny fotoana vao niakaran’io filoha teo aloha io teo amin’ny fitondrana. Efa filohan’ny filankevi-pitondrana ny Air Madagascar koa tamin’izany. Taty aoriana kely dia voatendry ho minisitra ny Raharaham-bahiny izy, ary talohan’ny nionganan’ny fitondrana Rajaonarimampianina izy dia minisitra ny Harena ankibon’ny tany.
Ny akon’ny fandehanan’ireo iraka ny Bianco teny amin’ity tranon’i Hentry Rabary Njaka ity aloha dia hoe hisambotra azy noho ny raharahan-keloka nahavoarohirohy azy.
Akory anefa ny hagagan’ireto iraka fa efa any ampitan’ny ranomasina, hono i Henry Rabary Njaka.
Aoka hotsorina ny resaka fa “nampandosirina aloha i Henry Rabary Njaka vao mody nanaovana fihetsiketsehana hoe hampanantsoina sy hosamborina”.
Efa firy taona ny gazety, toa ny La Gazette de la Grande Ile sy ity gazety Telonohorefy ity no nanao lahatsoratra nitanisa ny zava-doza, heloka sy fandikan-dalàna nataon’i Henry Rabary Njaka teto nandritra ny fotoana nitondran-dRajaonarimampianina, fa tonga amin’ilay fitenenana hoe “vohon-tsokatra nilatsaham-baratra, ka henoy izany rey hazon-damosiko”. Nofokaina sy noenjehina aza ny gazety nanambara ny zava-misy, na tao amin’ny Air Mad na tao amin’ny ministeran’ny Harena ankibon’ny tany, eny na izy nandalo volana vitsivitsy tao amin’ny ministeran’ny Raharaham-bahiny aza dia nisy raharaha hafahafa miendrika kolikoly nataony koa.
Izahay dia mahatsapa fa misy sokajin’oloona itsikombakomban’ny tompon’andraiki-panjakana ankehitriny ihany amin’ireo nahavanon-keloka nandritra ny fitondrana teo aloha, ka izay tsy tian-dry zalahy hosamborina na hampiharana ny lalàna dia mody anaovany sinema, fa misy olona kosa, izay tena tsy anetsehany volo-maso mihitsy koa.
Sanatriavin’ny vava ve dia resa-bola sy tombontsoa manokana avokoa no ao ambadik’izany?
Na ahoana na ahoana, i Madagasikara sy i Lafrantsa dia manana fifanaraham-piaraha-miasa amin’ny resaka raharaham-pitsarana ka inona no misakana ny fitsarana Malagasy tsy hangataka amin’ny fitondram-panjakana frantsay ny hampodiana an’i Henry Rabary Njaka (extradition) mba hizaka ny valin’ny heloka vitany teto? Sa mizaka ny zom-pirenena frantsay izy ka arovan’i Frantsa ?
