Mbola mitana ny resaka eto amin’ny firenena ny mahakasika an’i Eddy sy Mbola Rajaonah izay voasambotra ny herinandro lasa teo ka napetraka vonjy maika ao amin’ny fonjaben’i Tsiafahy, miandry ny fitsarana azy.
Tsy ireo irery nefa no anarana mandehandeha any rehetra any fa mety hisy koa ny fisamborana sy ny fanadihadiana azy ireny mahakasika ny raharaha andramena na ny “bois des roses” izany.
Efa anarana malaza hatramin’ny ela mahakasika ity andramena ity no miseho masoandro indray ankehitriny. Efa hatramin’ny taona 2009 ka hatramin’izao fotoana izao ny sasany amin’izy ireo.Olona avy any Antalaha sy Sambava ary Toamasina izy ireo.
Mandehandeha ny anaran’i Anona Etienne, Bekasy, Bematana Martin, Betsiarona Jean Golbert, Bezokiny Christian Claude, Body Thierry, Chan-Hoy Lané Kara, Laisoa Jean Pierre, Lalohely Jean Michel, Mbotofeno Sao Kune, Guerra William, Ndahiny Grégoire, Patricia Soa, Rakotoarivony Nosy Arivony, Ramiarison Arlan, Ranjanoro Jeannot, Rasoanirina Josephine, Sam Som Mioch, Soa Elia Rolaine, Thunam Roger, Totobe Eric, Super wood.
Hisy marina ve ny fanadihadiana azy ireto sa hijanona amin’i Eddy sy Mbola Rajaonah ihany ny raharaha ity hoy ny mpanara-maso ny raharaham-pirenena ankehitriny?
Eo amin’ny fanodinkodinana volam-panjakana indray dia miandry mafy ny fanadihadiana an’i Solonandrasana Olivier Praiminisitra teo aloha sy ny minisitra maromaro koa ireo mpanara-baovao. Mahakasika ny tolotrasa tao amin’ny ministera no tena ahafantaran’ny maro io raharaha fanodinkodinana volam-panjakana io toa ny raharaha Ambohimahamasina sy ny kaominina maro hafa. Ramatoa Razaimamonjy Claudine no natao sorona amin’ity raharaha ity. Miampy azy ny ben’ny tanànan’Ambohimahamasy Tsabo Pierre ary ny ben’ny tanànan’ Ialanindro.
Fantatra nefa fa olona maro no niray tsikombakomba tamin’izy ireo.
Manara-maso akaiky ireto raharaha ireto ny ankamaroan’ny mpanao pôlitika sy ny olom-pirenena maro.
JB
